#NoSCAf الإنكار مش هيفيد..والغضب بيزيد
- ماحدش ينكر أن في عصبية دينية..النظام القديم بناها ونماها, والنظام المستحدث زودها وعلاها, ولعب علي مجراها.
- ماحدش ينكر ان في عصبية كروية, جماهيرية, وأحداث شغب الملاعب موجودة في كل مكان, لكن اللي حصل في بورسعيد ده اسمه مذبحة مدبرة من النظام !
- ماحدش ينكر أن الثورة قائمة علي الغضب من القمع والإستبداد ونهب خير البلاد..ووده بيتحول لمطالب.
- ماحدش ينكر إن المتظاهرين عند الداخلية غاضبين وأصحاب هم ودم, زيهم زي كثير من المصريين.
- ماحدش ينكر ان الثورات ليها آثار سلبية..لأنها بتقوم ضد نظم مستبدة إجرامية, بيكون همها الأعظم تشويه وهدم الثورات, ومن هنا بتقوم حرب التخريب والفتن, ونسبها للثورة.
- ماحدش ينكر ان ثورتنا ثورة شعب, بكل طوائفه وفئاته, وماحدش ينتظر ان الثوار يكونوا ملائكة, او ان كلهم يعجبنا شكلهم او فكرهم.
- ماحدش ينكر ان مصر مطمع للكثيرين من قديم الأزل..وأكيد في تدخلات أجنبية, بس ماحدش ينكر أن نظام مبارك ومن بعده مجلسه العسكري خير منفذين للسياسيات الخارجية اللي هدفها استمرار المصريون في حالة تخبط وسعي خلف رغيف العيش, لأن مصر لوقامت, هتقضي علي مصالحهم في الشرق الاوسط.
- ماحدش ينكر ان مصر وصلت لحالة من اسوء الأحوال في ظل الحكم العسكري, وماحدش ينكر انه لازم تسليم الحكم لسُلطة مدنية.
- ماحدش ينكر ان المجلس العسكري ارتكب جرائم في حق المصريين وحقوق الإنسان بصفة عامة, وماحدش ينكر انهم خايفين من لحظة الحساب, قبل يوم الحساب.
- ماحدش ينكر ان المجلس العسكري بيماطل في تسليم السلطة, ومش ناوي يسلم الا بعد ضمان الخروج الآمن.
- ماحدش ينكر ان اختفاء الأمن والجريمة المنظمة دي لو حصلت في اي مكان غير مصر, كان زمانها ولعت ! لكن ده دليل جديد علي الطبع الأصيل للمصريين اللي مختفي خلف قمع السنين وفقر وجهل ومرض التنين !
- ماحدش ينكر ان الثورة علي حق وكل ماعداها علي باطل..لكن في ناس بتعمل بمبدأ "عاش الملك, مات الملك"..الثورة تحقق شئ, يبقي تحيا الثورة, الثورة تناضل وتقع في مشاكل, يبقي يحيا العجلة !
- ماحدش ينكر خيبة الأمل اللي بدأت تظهر في البرلمان,,اللي الناس انتخبته واللي حتي الآن كل إجرائاته روتينية لا ترقي لمستوي الثورة.
- ماحدش ينكر ان خلال السنة اللي عدت, لم تتحقق الأهداف الرئيسية للثورة (عدالة إجتماعية – كرامة إنسانية – تطهير مؤسسات الدولة – إسترداد حقوق الشعب المنهوبة داخلياً وخارجياً – محاسبة الفاسدين والمجرمين والقصاص للشهداء والمصابين), بل علي العكس زاد الفقر والقمع والسلطوية والنهب وازداد عدد الشهدء والمصابين.
- ماحدش ينكر ان الحرب ضد الثورة في ذروتها, من إعلام فاسد وفلول النظام وعصاباته, واجهزة قمعية تحت حكم المجلس العسكري..ولكن الخصم الأعظم للثورة هو..الشعب نفسه, لما ينقاد خلف أكاذيب ويرددها, لما يصدق ان شباب ثورته "بلطجية وقابضين"..لما يصدق ان الدول الأجنبية بتساعد في الثورة "علي اساس انهم عايزين مصر تنهض يعني !"..مفيش مانع تتضامن معانا كل الشعوب, لكن اكيد بدون حكوماتها..الشعب هو السلاح وهو الهدف...لو شايفين الثورة غلطانة, يا تصلحوا يا تسكتوا..."فلتقل خيراً أو لتصمت" والكلام لأصحاب الدعوات الدينية والدنياوية.
- ماحدش ينكر ان للثورة اخطاء..لأنها ثورة شعب, بشر خطاء..يسعي لحياة كريمة..
- وماحدش ينكر انه...يسقط الحكم العسكري.
النصر للثورة, عاجلاً أم آجلاً..بإذن الله
