#حدث_بالفعل
مواطن واقف يتفرج على قائمة انتخابات معلقة في الشارع.. وحصل معاه اللقاء ده:
كاميرة: مساء الخير يا فندم.. حضرتك بتفكر تنتخب مين؟
المواطن: الحقيقة لسه بفكر بس صوتنا أمانة ولازم ننزل نختار.
كاميرة: وحضرتك شايف أن الانتخابات هتصلح حال البلد؟
المواطن: وماله حال البلد حضرتك؟ ماهي ماشية كل يوم للأحسن.
كاميرة: يعني حضرتك شايف الوضع الاقتصادي أفضل؟
المواطن: أكيد طبعا.. من ساعة المؤتمر الاقتصادي والريس ما بطلش سفريات واتفاقات.
كاميرة: طيب ليه الأسعار زادت والدولار سعره زاد وفي ركود في حركة التجارة وأزمة مياه وبنزين وغيرها من مشاكل؟
المواطن: د.. دي ...حاجات بسيطة هتتظبط مع الوقت!
كاميرة: طيب حضرتك شايف الوضع السياسي مستقر ويشجع الاستثمارات جديدة؟
المواطن: طبعا! احنا كنا فين وبقينا فين!
كاميرة: يعني يا فندم شايف أن في أحزاب وتنوع ومشاركة سياسية وحرية رأي؟
المواطن: ماهو الريس قال الكلام ده مش وقته علشان بنحارب الإرهاب.
كاميرة: وحضرتك شايف أن في تقدم في الحرب على الإرهاب؟
المواطن: أكيد.. الجيش طلع بيان قريب وقال أن سيناء شبه خالية من الإرهاب!
كاميرة: يعني حضرتك ما سمعتش عن أي تفجيرات او قتل جنود أو مدنيين هناك من قريب؟
المواطن: سمعت طبعا بس هي مسألة وقت.. والشرطة شايفة شغلها كويس وبعدين على فكرة الإعلام مش دايما بيقول الحقيقة!
كاميرة: طيب حضرتك شايف نسبة الإعلام المعارض مقابل الإعلام المؤيد للنظام كام لكام؟
المواطن: مفيش حاجة اسمها إعلام معارض.. المفروض الإعلام ده يبقى وطني.. زي الأستاذ أحمد موسى كده.
كاميرة: يعني حضرتك رأيك أن الإعلام دوره تشجيع الدولة ومنع ذكر الحقائق اللي تظهر فشلها؟
المواطن: في المرحلة دي أيوة.. علشان الناس مش ناقصة إحباط في الظروف دي!
كاميرة: بس حضرتك لسه بتقول أن الحال أحسن وأنك مش عايز الإعلام يكذب؟
المواطن: الحقيقة..آآآ......
"فجأة واحد بيجري في الشارع شد الموبايل من إيد المواطن"
المواطن: خد يا ابن ال@#$%.. حد يمسكه يا بلد بنت *&^%.. لو في بوليس إبن *&*%^ في البلد بنت ال*%*&% دي كان زمانه نفخ الشعب ابن ال#$*& ده.. يارب أهاجر من هنا.
End of text.
