انا عرفت ليه ماجاليش إحباط ! :)
فلاش باك سريع:
بعد أحداث " محمد محمود " فى شهر نوفمبر 2011 , ظهرت حالة إحباط عام عند ناس كثير ونشطاء وحركات واتعرفت بإسم " متلازمة محمد محمود " .. فى هذا التوقيت تحديداً ظهر للجميع حقيقة أن المجلس العسكرى " خاربها " .. وناس كثير ما كانتش مصدقة نفسها من مشهد الجثث فى الزبالة ! " لدرجة انه طلع اشاعة بأن المشهد ده فى اليونان مش فى مصر " وكانت دى الصدمة اللى اظهرت الحقيقة للكل حتى اللى كانوا عارفين و "مطنشين " .
..
ودخلت انتخابات مجلس الشعب وسرقت الأضواء الإعلامية عن المشاهد الدموية..واستمرت حالة الإحباط حتى احداث مجلس الوزراء, وظهور حملة " كاذبون " .. بدأت الحركة تشتغل من جديد ودارت الأحداث وحصلت مذابح جديدة وشهدنا برلمان عديم الصلاحيات وعديم الثورية حتى وصلنا إلى حالة جديدة من الإحباط العام.. دوامة الدستور ولجنته العجيبة الغير دستورية !, ومرشحين الرئاسة اللى ظهرتلهم برامج انتخابية ووعود مستقبلية من غير ما يعرفوا صلاحياتهم واختصاصتهم, واتضحت القوانين المعيبة المجحفة زى أيام مبارك..وظهرت اسئلة من نوع " انتخب مين؟ " و " ايه المسرحية اللى بتحصل دى ؟ " و " ماهم هيسلموا السلطة فى شهر 6 اهو..عايزين ايه تانى؟ " . هدأت الحركة والمسيرات والوقفات " اللهم " تضامن مع معتقلين او محاكمين عسكريا او مصابين ثورة واهالى شهداء بخلاف الإضرابات فى القطاعات العمالية وبعض القطاعات الأخرى.. وركز الإعلام " ونحط خطين تحت الإعلام دى " على الرئاسة والرئيس القادم وتنتخبوا مين..وحبيبكم مين.
أنا من زمان ما بتابعش التليفزيون..من زمان جداً, إلا اذا عرفت من حد ان فى " فلان " فى برنامج كذا , او شوفت على الإنترنت ان " علان " طالع يتكلم بخصوص كذا, فيما عدا ذلك " حد الله " اللى عايز اعرفه موجود..عندى إعلام بديل " وخصوصا الإنترنت " .. المهم, لاحظت ان معظم الناس اللى اصيبوا بحالة الإحباط إياها, بيتفرجوا على التليفزيون طبعاً .. عشرات من الأفكار المسمومة يومياً على الله..آراء سفيهة, وأفكار موجهة و إشاعات وبلالين إختبار وهلم جرا.. كل ده على راس المواطن الغلبان اللى مزنوق فى ام بلده ! من ساعة الثورة, رغيف العيش, مفيش .. بنزين, مفيش .. انبوبة البوتجاز, موتوا بعض ! إنفلات أمنى , على اعلى مستوى "حاجة كده 5 نجوم" .. والشعب كله لازم يشترك فى الحاجات دى "على رأى البيه الكبير !" .. مجلس الشعب مكلمة كبيرة ومهرجانات واتهامات وتفاهات, وأخيراً..الرئيس التوافقى والمرشح المحتمل .. ولجنة ال 100 اللى مية مية.
وعليا من ده بإيه؟ ما انا كافى " تويترى " على " فايس بوكى " ومظبط الأخبار, اما الناس اللى بتتابع التلفزيون ...لكم الله يا شعب مصر, بكرة تفوقوا وتبطلوا نوع المخدرات الرخيصة دى, او ربنا يكرم, ويسقط حكم العسكر, ويتطهر الإعلام, ولحد ما ده يحصل ... يسقط التلفزيون " الرطراط " وإعلام الإحباط.
ملحوظة:
لعلاج الإحباط: 3 ساعات تويتر فى اليوم على 3 فترات " صبح - عصر - ليل " مع مراعاة إختيار الشخصيات اللى بيتعملها فولو..لأن فى ناس بتزود الإحباط.
ليست هناك تعليقات:
إرسال تعليق