سيبك من سخرية وقلش بعض الأخوة السعوديين (رغم أنه دمه مش خفيف أنه سعودي يروح يصور نجار مسلح ويقول له إعمل لنا كوبري على البحر الأحمر ويبقى كده شبح يعني) عندنا ناس ياما قلشت وبتقلش على العالم كله في السرّاء والضراء.. ما تحبِكّهاش يعني، وسيبك برضو من نظام المعايرة و"بفلوسي يا كلاب..الخ"، عادي، بكره تنسى أو تتناسى.
سيبك كمان من النزاع على الجزر وأنها تحت السيادة المصرية منذ الأزل، وسيبك من معاهدة 1906 "رغم أن الخريطة دي نفسها اللي رجعت طابا بالتحكيم الدولي" وسيبك أصلاً من كل الخرائط وتصريحات عبد الناصر والعسكريين المصريين عن انتماء الجزيرتين لمصر، وطبعا مش مهم المراسيم المصرية بتحديدهما محميات طبيعية والقرارات الرئاسية المتضمنة حدود مصر بما فيها الجزر وأم الرشراش "إيلات"، وهننفض لوضع الجزر كجزء من مصر ضمن معاهدة السلام وإخطار الأمم المتحدة في أكثر من مناسبة بتبعية تيران وصنافير لمصر. المهم الحب بين الأشقاء.
وأكيد طبعا هتسيبك من المادة 151 من الدستور وموضوع العرض على البرلمان والاستفتاء الشعبي في التحركات التي تمس السيادة وعدم جواز التنازل عن أي جزء من الإقليم بأي شكل. إيه المشكلة لما تحصل مفاوضات لمدة سنة وبعدين يتم توقيعها في الخفاء، هتكون أدرى بمصلحة الوطن من الحٌكّام؟ ولا كنت عايز الدولة تعلن عن الموضوع وتفضل تقلش وتحفـّل وتشكّل عليهم وهاشتاجاتك وكوميكاتك.. إحنا ناقصين؟
وطبعاً ماحدش يتكلم عن الخرائط المضروبة وتزوير مقتطفات من كتاب المؤرخ الفذ الراحل، جمال حمدان "سيناء في الاستراتيجية والسياسة والجغرافيا" تنسب له زوراً قول أن الجزر سعودية، بس الحي أبقى من الميت. وماحدش برضو يتكلم عن نعيم شقير وكتابه "تاريخ سينا القديم والحديث وجغرافيتها" سنة 1916، وكثر خير الأشقاء لما تركوا النزاع على الجزيرتين جانبا للملك فاروق بعد قيام الخازوق الصهيوني وحرب 1948، تيجي تقول أصل الفنان محرم فؤاد عمل أغنية "مضيق تيران مليان حيتان" سنة 1967.. هنهزر؟
مش هقدر أقولك سيبك من شهدائنا في ممر تيران وعلى الجزيرة نفسها في حروب 1956 و1967 و1973، (الحقيقة أن غلق الممر كان أحد الأسباب الرئيسية للعدوان الثلاثي على مصر)، المنطقة دي تجتذب الصراعات منذ فجر التاريخ وحصلت فيها معركة قبل موقعة حطين، لأنها نقطة استراتيجية تسيطر على منفذ سيناء لخليج العقبة ومن أحكم سيطرته عليها، يملك زمام المبادرة والمناورة البحرية في المنطقة. بس أكيد الرئاسة عارفين ده كله وأكيد عندهم مبرر، ده حتى الرئيس قال "والله العظيم أنا لو ينفع أتباع.. هتباع"، هتقفش لي في جزيرتين مليانين ألغام؟ "أيوة الصهاينة لغمومهم قبل ما يخرجوا لتضييق حدود الاستفادة منهما".
ممكن تكون ما سمعتش أن الأمريكان ضغطوا على القيادة السياسية عندهم -قبل إعلان الاتفاقية بيومين- لسحب جنودهم من قوات حفظ السلام بسيناء لتزايد الهجمات الإرهابية عليهم، وده طبعاً زعل الصهاينة جداً اللي هم مخزنين من آخر تفاهمات أمريكية إيرانية حصلت (واخدلي بالك من إيران وسنة vs شيعة وكده؟)، وطبعا الممر ده كان مصري وأي تواجد مسلح فيه كان لازم بموافقة مصر وده قبل الاتفاقية لكنه حالياً ممر دولي يلزمه اتفاقيات وتحكمه أعراف الملاحة الدولية، رغم أن عرض خليج العقبة 24 ميل والممر وجزيرة تيران والمضيق يقعان ناحية مصر قبل نصف المسافة. ايه المشكلة لما نفتح أبواب الصراعات دي والمملكة الشقيقة كتفها في كتفنا؟ مش كده أحسن؟
ليست هناك تعليقات:
إرسال تعليق